حبّيتها وحبّتني

حبيّتها وحبّتني

كي غيّرتها طائر كسير رمتني

قالت ليّ

الحبّ بالمعروف موش مزيّة

الحبّ حرّ يعيش في الحريّة

لا يا بنيّة

الحبّ الصّحيح يكون

ثابت ديما

وأن كنت أنا ريح كي البرّيمة

تكوني المصباح

اللّي يضوّي عليّ

نرجع صافي

نرجع مثيل الماء صادق وافي

ونعيشو حالة عشق أبديّة

حكمك عليّ قاسي

يشيّب راسي

نعيش معاك

متحيّرة في يقظتي ونعاسي

نعدّي عمري في شقاوة نقاسي

أنا حشرة ساكنة في حجرة

وإنت كي العصفور

من شجرة لشجرة

إنت الفارس، إنت الرّايس

الحبّ الحنين

بالذّل يكون مذلّة

الحبّ العزيز بالضرّ يكون مضرّة

الحليب يصبح قارس

تشوف الطّبائع بيه حافلة في مارس

القلب يشعل مثل الحطب اليابس

للموت ماشي عاري راجع لابس

في السّجن حابس

يغنّي بدمع الغيم للحريّة

حبّك مالح

كلامك ساعة جميل وساعة جارح

يخلّيك مرّة حزين ومرّة فارح

ديما سارح

تتمنّي روحك طير

لكن بلاش جوانح

كيف يرجع حبّك مثيل الماء

صادق صافي

يرجع حبّي ليك مثل الحليب

الصّافي

نرجع صغيرة معاك

ترجع صغير معايا

نغنّي غنايا تقولها الغنّاية

كم مشينا في طريق مقمر

تصل الفرحة فيه قبلنا

وضحكنا ضحك طفلين معا

وعدونا عكس الرّيح

حتّي سبقنا ظلّنا

تسكن ظلّي ونسكن ظلّك

كي نحسّ بيك هوايا

كي نحسّ روحي معاك مثل مرايا

نغنّوا كي الأطيار للحريّة

ونعيشو حالة عشق أبديّة

أنا منّك وإنت منّي

أنا فيك وإنت فيّ

سكّر وإلاّ ملح

حليب وإلاّ ثلج

تحتاجني ونحتاجك

الحبّ تاجي كيف ما هو تاجك

الحبّ جرحي وجرحك

هو علاجي كيف ما هو علاجك

الحبّ حزني وحزنك

هو فرحي كيف ما هو فرحك

سجني وسجنك

ها الحبّ مثل الغيم

مثل اللّهب يغنّي الحقّ وللحريّة